வெடிகுண்டு வெங்கட்

கை மாறியது இசை அருவி மற்றும் சிரிப்பொலி - பலமானது கலைஞர் குழுமம்

2009-10-11T22:42:00.001+05:30

மக்களே,

ரொம்ப நாள் கழிச்ச்சு இன்னைக்கு தான் சென்னையில் ஒரு சன்டேவை கழித்தேன். வழக்கம் போல எங்கும் போகாமல் வீட்டிலேயே கழிக்கலாம் என்று நினைத்து தொலைக்காட்சியை ஆன் செய்து காமெடி அல்லது மியூசிக் சேனல் பக்கம் போனால் ஒரு விந்தை காணப்பட்டது. ஆம், வழக்கமாக ரெண்டு பாட்டுக்கு ஒரு முறை விளம்பர பிரேக் எடுக்கும் இசை அருவி மற்றும் சிரிப்பொலி சேனல்களில் இன்று விளம்பரங்களே காணப்படவில்லை. (மிதமாக இரண்டு மூன்று குழும விளம்பரங்களே வந்தன). சரிதான், என்னமோ விஷயம் என்று விசாரித்தேன். அதன் பின்னணியே இன்றைய இந்த பதிவு.

கலைஞர் தொலைக்காட்சி முதன்முதலில் இரண்டு ஆண்டுகளுக்கு முன்பு ஆரம்பிக்கப் பட்டபோது தொடர்ச்சியாக மூன்று நான்கு சேனல்கள் ஆரம்பிப்பது என்று முடிவெடுக்கப்பட்டது. பின்னர் இசை அருவி என்ற மியூசிக் சேனல் ஆரம்பிக்கப்பட்டபோது தமிழக தொலைக் காட்சி வரலாற்றில் இல்லாத ஒரு புதுமையாக அந்த சேனலை மார்க்கெட் செய்யும் பொறுப்பை வேறு ஒரு தனியார் நிர்வாகத்திடம் மினிமம் கியாரேன்டி முறையில் ஒப்படைக்கப்பட்டது.

அப்படி ஒப்பந்தம் செய்யப்பட்ட ஒரு தனியார் நிறுவனமே சோசியல் மீடியா இந்தியா லிமிடெட். இந்த நிறுவனம் நார்த்கேட் டெக்னாலஜிஸ் லிமிடெட் என்ற அமெரிக்க நிறுவனத்தின் இந்திய அமைப்பாகும். இந்த நார்த்கேட் டெக்னாலஜிஸ் லிமிடெட் சுமார் ஐந்நூறு மில்லியன் அமெரிக்க டாலர்கள் பெறுமானமுள்ள ஒரு மிகப்பெரிய இன்டர்நெட் துறை சார்ந்த நிறுவனமாகும். அவர்களை பற்றி மேலும் தெரிந்து கொள்ள இங்கே கிளிக் செய்யவும்.

பின்னர் கலைஞர் நிர்வாகம் சென்னையில் முரசு என்ற கேபிள் சேனலை கூட மார்கெட் செய்யும் பொறுப்பை இந்த சோசியல் மீடியாவிடமே ஒப்படைத்தது. அதன் பின்னர் இந்த ஆண்டு ஆரம்பிக்கப் பட்ட சிரிப்பொலி என்ற காமெடி சேனலை கூட மார்கெட் செய்யும் பொறுப்பு இவர்களுக்கு வழங்கப் பட்டது. கலைஞர் குழும நிழலாகவே இவர்கள் கருதப்பட்டார்கள். ஆரம்பித்த சில நாட்களிலேயே இசை அருவி சேனல் சிறப்பாக செயல்பட்டு சன் மியூசிக் சேனலை ஆட்டம் காண வைத்தது (டி.ஆர.பி ரேட்டிங் மற்றும் விளம்பர வருவாய் - இரண்டிலுமே).

ஆம், எந்த ஒரு துறையிலும் முதன்மையாக இருக்கும் சன் குழும சேனலை ஆட்டம் காண வைத்தது இந்த இசை அருவி சேனல். முதன் முறையாக மியூசிக் சேனல்களில் முதல் ரேட்டிங் பெற்று சன் குழுமத்தினரை ஆட்டம் காண வைத்தது. மேலும் சோசியல் மீடியா நிர்வாகத்தினர் புதுமையாக பல நிகழ்ச்சிகளை செய்து (தமிழ் மியூசிக் அவார்ட்ஸ், பல சிறப்பு நிகழ்வுகள் என்று) தமிழக மக்களை தங்கள் கட்டுக்குள் வைத்து இருந்தனர்.

ஆனால் திடீரென்று சனிக்கிழமை அன்று கலைஞர் டிவி நிர்வாகம் அவர்களின் காண்டிராக்டை முறித்துக்கொண்டது, அதுவும் உடனடியாக. இதில் உடனடியாக என்பது கவனிக்கப்பட வேண்டிய விஷயமாகும். இந்த தீபாவளி சீசனில் பலரும் விளம்பரத்தில் குறியாக இருக்கும் போது திடீரென்று இந்த சம்பவம் நடந்து உள்ளது. இது வரை கொடுத்து உள்ள விளம்பரங்கள் அனைத்தும் கேன்சல் செய்யப் பட்டு இன்று முதல் அனைத்து விளம்பரங்களும் கலைஞர் டிவி நிர்வாகத்திடம் மட்டுமே புக் செய்யப்பட வேண்டும் என்றும் கூறப்பட்டு உள்ளது. இதோ, அதனை உறுதிப்படுத்தும் கடிதம்.

இதன் காரணமாக இன்று (அதாவது ஞாயிற்றுகிழமை) ஆச்சரியமாக கலைஞர் டிவி மார்கெட்டிங் குழு பணிக்கு வந்தார்கள். வந்து அவர்கள் அனைவரிடமும் புதிய விளம்பர ஒப்பந்தங்கள் செய்து அதன் பின்னரே விளம்பரங்கள் வர ஆரம்பித்தன. பின் குறிப்பு: எதற்காக இந்த மாற்றம் என்பதில் பல கருத்துக்கள் நிலவுகின்றன. நம்பத் தகுந்த வட்டாரத்தில் இருந்து இதுவரை தகவல்கள் வராததால் எதனையும் உறுதிப்படுத்தி கூற இயலவில்லை.

அதே சமயம் சில பல ரூமர்கள் / வதந்திகள் உலவுகின்றன. அவற்றை மட்டும் இங்கே அளிக்கிறேன். கவனிக்கவும், இவை உறுதிப்படுத்தப்படாதவை.

1. மினிமம் கியாரேன்டி கடந்த நான்கு மாதங்களாக தரப்படவில்லையாம். பல நினைவுருத்தல்களுக்கு பின்னரே இந்த திடீர் அதிரடி முடிவாம்.

2. கலைஞர் குழும உயர் அதிகாரி ஒருவருக்கும் சோசியல் மீடியா சென்னை நிர்வாகத்துக்கும் கடந்த பல மாதங்களாக நடந்த பனிப்போரின் விளைவே இது என்றும் கூறுகிறார்கள். கடைசியில் குடும்பமே வென்றதாம். இதனை கொண்டாடும் விதமாக இன்று பணிக்கு வந்த பெரும்பாலான அலுவலர்களை ஒரு மூன்று நட்சத்திர ஹோட்டலில் மதிய விருந்து வைத்து மகிழ்ந்தாராம்.

3. இந்த மார்கெட்டிங் முறையை அமுல்படுத்தியவர் கலைஞர் தொலைக்காட்சியின் முதன்மை மேலாளர் திரு சரத்குமார் ஆகும். இவர் கலைஞர் தொலைக்காட்சியில் இருவது சதவீதம் பங்குதாரரும் ஆவார். நவம்பரில் நடந்த ஒரு சம்பவத்திற்கு பின்னர் இவர் கலைஞர் டிவி வருவதே இல்லை என்பது ஊரறிந்த உண்மை. அவரே இல்லாதபோது, இவர்களுக்கு என்ன வேலை என்று செயல்பட்டதால் நடந்த வேலை இது என்றும் கூறுகிறார்கள்.

நாளைய மனிதன் - அதிசய மனிதன் படங்களை தொடர்ந்து "நானே வருவேன் "

2009-10-03T12:50:00.002+05:30

மக்களே,

இப்போது வேலு பிரபாகரனின் காதல் கதை என்ற படத்தை எடுத்த வேலு பிரபாகரன அவர்களை கடவுள், புரட்சிக்காரன், காதல் கதை போன்ற புரட்சிகரமான முற்போக்கு (முன் நவீனத்துவம்?) சிந்தனையுள்ள படங்களை இயக்கியவராக மட்டுமே நமக்கு தெரியும். நேற்று எனக்கு வந்த ஒரு அழைப்பிதழை பார்த்த பொது தான் அவரைப் பற்றிய முழு விவரத்தையும் தெரிந்து கொள்ளும் வாய்ப்பு கிடைத்தது. அவரைப் பற்றி மேலும் தெரிந்து கொள்ள இங்கே கிளிக்கவும்.

நான் சிறு வயதில் ரசித்து பார்த்த படங்களில் நாளைய மனிதன், அதிசய மனிதன், ஜென்ம நட்சத்திரம் போன்ற படங்கள் அடங்கும். அதிலும் சாகாத ஒரு மனிதனை பற்றி சிறு வயதில் சிலாகித்து பயந்த காலங்களும் உண்டு. நாம் அதிஷா இந்த படங்களுக்கு ரசிகர் மன்றமே ஆரம்பித்தாலும் ஆரம்பிப்பார் போல. அந்த அளவுக்கு இந்த படங்களுக்கு ஒரு சிறப்பிடம் உண்டு. இப்போது இந்த "நாளைய மனிதன் - அதிசய மனிதன்" படங்களை தொடர்ந்து அடுத்து ஒரு படம் இதே வரிசையில் வரப் போகிறது. இதோ அந்தப் படத்தின் விவரங்கள்.

முதல் படமாகிய நாளைய மனிதனில் இளைய திலகம் பிரபு ஒரு ஆங்கில காப் போன்ற ஒரு போலீஸ வேடமேற்று நடித்து இருப்பார். அதிலும் அந்த கிளைமாக்ஸ் காட்சி இப்போதும் கண்முன்னே நிற்கும். இரண்டாவது பாகத்தில் நிழல்கள் ரவி அதைப் போலவே போலீஸ வேடத்தில் வருவார். இது போன்ற படங்களில் எல்லாமே வருவது போல கிளைமாக்சில் அந்த வில்லன் சாவது போல தெரியும், ஆனாலும் உறுதியாக சொல்ல முடியாது. இப்போது இந்த புதிய படத்தில் பாபு கணேஷ் அவர்கள் பிரபு, நிழல்கள் ரவி போல லீட் கதாபாத்திரம் ஆக நடிக்கிறார் போல.

ஆனாலும் ஸ்ரீமன் கையில் சிவப்பு பெயின்ட் அடித்த அந்த கோடாரியை வைத்து இருப்பதை பார்க்கும் போது அவரும் ஹீரோவாக இருப்பாரோ என்ற சந்தேகம் வருகிறது. சின்னி ஜெயந்த் வேறு இருக்கிறார். என்ன நடக்குமோ என்று இப்போதே ஒரு பயம் கிளம்பி விட்டதை தவிர்க்க முடியவில்லை.

அந்த படங்களில் எல்லாம் அந்த நாளைய மனிதனாக நடித்தவர் நம்ம அஜய் ரத்னம். அவரை காணவில்லை போல. அதனால் ஒரு புதிய முகம் காட்டாத வில்லன் நடிக்கிறார் என்று நாம் வைத்துக் கொள்ளலாம்.

தசாவதாரத்துடன் மோதும் படிக்காதவன் : தீபாவளி திரைப்படங்கள்

2009-10-01T17:21:00.002+05:30

சென்ற வருடம் தீபாவளி அன்று சந்திரமுகியுடன் மோதிய பில்லா கதை போல இந்த வருடம் தீபாவளி அன்று மறுபடியும் மோத சன் டிவி மற்றும் கலைஞர் டிவி நிறுவனங்கள் தயாராக உள்ளன.

கலைஞர் டிவி மிகுந்த பொருட்செலவில் வாங்கிய கமல் பத்து வேடத்தில் கலக்கிய தசாவதாரம் படத்தை இந்த தீபாவளிக்கு ஒளிபரப்புகின்றனர். அதற்காக அவர்கள் விளம்பர வேட்டையில் இறங்கி உள்ளனர். வழக்கமாக பதினாலாயிரம் ருபாய் விலைக்கு பத்து செகண்ட் சார்ஜ் செய்யும் கலைஞர் டிவி இந்த படத்துக்காக ருபாய் இருபத்தி ஐந்தாயிரம் என்று விலையை நிர்ணயித்து உள்ளனர். கமல் மேஜிக் பெரிய திரையில் நடந்தது போல சின்ன திரையிலும் நடக்கும் என்பது இவர்களின் எண்ணம்.

அதே நேரம் தனுஷ் நடித்த படிக்காதவன் படத்தை ஒழி பரப்ப சன் டிவி முடிவு எடுத்துள்ளது. வழக்கமாக இருபத்தி ஐந்தாயிரம் ரூபாய்க்கு பத்து செகண்ட் விளம்பரம் வாங்கும் சன் டிவி இந்த மெகா ஹிட் பிளாக்பஸ்டர் படத்துக்கு முப்பத்தி எட்டாயிரம் ருபாய் சார்ஜ் செய்கிறார்களாம். வழக்கம் போல இதுவும் ஒரு வெற்றி முயற்சியாக அமையும் என்பதில் அவர்களுக்கு இருவேறு எண்ணம் இல்லையாம்.

சென்ற வருடம் இதே போல நடந்த மோதலில் (சந்திரமுகி + பில்லா) சன் டிவியே ஜெயித்தது உங்களில் பலருக்கு நினைவிருக்கலாம். அதனால் இந்த வருடம் தசாவதாரம் படத்துடன் மோத மருத்துவர் விஜய் நடித்த போக்கிரி படம் தான் ஒலிபரப்ப படும் என்று பலரும் நினைத்திருந்த வேளையில் இப்படி ஒரு செய்தி வந்துள்ளது அனைவரின் கவனத்தியும் கவர்ந்து உள்ளது. குறிப்பாக சுப்ப்ரமணிபுரம் மேட்டருக்கு பின்னர் இப்படி நடந்து உள்ளது ஆச்சரியமாக உள்ளது.

சன் டிவியை பற்றி நன்றாக தெரிந்தவர்கள் கண்டிப்பாக அவர்கள் வேறொரு படத்தை கமலுக்கு போட்டியாக களமிறக்குவார்கள் என்று கற்பூரம் ஏற்றி சத்தியம் செய்கிறார்கள். பார்க்கலாம், என்ன நடக்கிறது என்று.

சுப்ரமணியபுரம் - கை மாறிய கதை

2009-09-26T17:50:00.002+05:30

ஜீ தமிழ் என்ற ஒரு சேனல் தமிழ் நாட்டில் தட்டு தடுமாறி வந்து கொண்டு இருப்பது உங்கள் அனைவருக்கும் தெரிந்த கதை. என்னடா இவன், இந்தியாவில் முதல் முறையாக சாட்டிலைட் சேனல் ஆரம்பித்த ஜீ குழுமத்தின் சேனலை பற்றி இப்படி தட்டு தடுமாறி வருகிறது என்று கூறுகிறானே என்று கூட நீங்கள் யோசிக்கலாம். ஆனால், உண்மை அது தான். அதன் பின்புல விவரங்கள் கீழ்வருமாறு:

சென்னை மற்றும் தமிழ் நாட்டின் முக்கிய நகரங்களில் கேபிள் குழுமங்களை இயக்குவது SCV என்று அழைக்கப்படும் சுமங்கலி கேபிள் விஷன் என்பது அனைவருக்கும் தெரியும். அந்த குழுமமே சென்னையில் எண்பத்தி ஐந்து சதவீதம் அளவிற்கு கேபிள் வீடுகளின் கனேக்டிவிடியை SCV கட்டுப்பாட்டில் வைத்து இருப்பதும் நீங்கள் கேள்விப் பட்ட உண்மையே. அதனால் எந்த ஒரு புதிய சேனல் பல கோடி ரூபாயை செலவு செய்து தமிழகத்தில் ஆரம்பித்தாலும் இவர்கள் அதனை காண்பித்தால் மட்டுமே அது மக்களை சென்று அடையும்.

இந்த சூழ்நிலையில் ஆரம்பிக்கப் பட்ட ஜீ தமிழ் சேனல் பல தொழில் நுட்ப வல்லுனர்களையும், துறை அறிஞர்களையும் கொண்டு ஆரம்பிக்கப் பட்டாலும் அது இருட்டடிப்பு செய்யப் பட்டது மக்களுக்கு நன்றாக தெரியும். இன்னனும் அந்த சேனல் செட் டாப் பாக்ஸில் வரவில்லை என்பது ஆரம்பித்து ஒரு வருடம் கழித்தும் தொடரும் கொடுமை.

எப்போது ஒரு சேனல் மக்களுக்கு சென்று அடைய வில்லையோ அப்போதே அந்த நிகழ்ச்சிகள் வெற்றி அடையாது. அதனால் அங்கு எந்த அளவுக்கு நல்ல நிகழ்ச்சிகள் இருந்தாலும் வணிக அளவில் அவை வெற்றி அடையவில்லை. இருந்தாலும் தன முயற்சியில் சற்றும் மனம் தளராத விக்கிரமாதித்தன் போல அந்த நிர்வாகமும் தொடர்ந்து படங்களை வாங்குவதிலும், சீரியல்களை ஆரம்பிபதிலும் மும்முரமாக இருந்த வந்தனர். அதனால் தான் சுட்ட பழம், ஸ்டெப் நீ போன்ற சரித்திர புகழ் பெற்ற படங்களை நம்மால் கண்டு ரசிக்க முடிகிறது.

சுப்ரமணியபுரம் படம் வெளிவருவதற்கு முன்பே ஜீ தமிழ் சேனல் அந்த படத்தின் தொலைக்காட்சி ஒலி பரப்பும் உரிமையை வாங்கி விட்டனர். கடந்த நான்கு மாதங்களாக அந்த படத்தை விரைவில் என்று விளம்பரம் செய்தும் அனைவரையும் கவர்ந்து கொண்டு இருந்தனர். அது ஒரு வெற்றி பெற்ற படம் என்பதால் அந்த படத்தை பலரும் எதிர்பார்த்து இருந்தனர் என்பது மறுக்க இயலாத உண்மை. வணிக அளவில் ஒரு கணிசமான தொகையை ஈட்ட இந்த படம் ஜீ தமிழ் நிறுவனத்திற்கு ஒரு வாய்ப்பாக அமைந்தது.

அதனால் இந்த திங்கள் அன்று அந்த படத்தை ஒலி பரப்ப ஜீ தமிழ் நிர்வாகம் முடிவு எடுத்தது. அன்று விஜய தசமி என்பதால் அது மக்களை கண்டிப்பாக சென்றடையும் என்பது நிர்வாகத்தின் அசைக்க முடியாத நம்பிக்கை. தொழில் முறை போட்டியாளர்களின் படங்கள் ஒன்று பெரிய அளவில் போட்டியாக இல்லை என்பதும் ஒரு முக்கிய விஷயம். ஆம், கலைஞர் டீவியில் "அபியும் நானும்" என்ற படமும், சன் டீவியில் "வெடிகுண்டு முருகேசன்" என்ற படமும் ஒளிபரப்ப முடிவு செய்து இருந்தனர். அதற்கான ஆயத்தமும் செய்யப் பட்டு விளம்பரதாரர்களுக்கு தகவலும் தெரிவிக்கப் பட்டது.

இந்த படத்தின் முக்கியத்துவத்தை உணர்ந்த ஜீ தமிழ் நிர்வாகம் அனைத்து விளம்பரதாரர்களிடமும் சிறப்பான முறையில் பேசி விளம்பரங்களை பெற்று மகிழ்ச்சியாக இருந்தபோது திடீரென வெள்ளிக் கிழமை அன்று சன் டீவியில் சுப்ரமணியபுரம் படம் விஜயதசமி சிறப்பு படம் என்று விளம்பரம் வந்த வுடன் மக்கள் என்ன நடக்கிறது என்று தெரியாமல் முழிக்க ஆரம்பித்தனர். எனென்றால், ஒரு டிவி வாங்கிய படத்தை அனுமதியில்லாமல் மற்ற டிவி ஒளிபரப்பினால் அது சட்டப்படி குற்றமாகும்.

சன் டிவி சுப்ரமணியபுரம் படத்தை மாலை ஆறு மணிக்கு ஒளிபரப்ப போகிறார்கள், அதாவது ஜீ தமிழ் ஒளிபரப்ப முடிவு செய்த அதே நேரத்தில். அதாவது உலகத் தொலைக்காட்சி வரலாற்றில் முதல் முறையாக ஒரே நேரத்தில் இரண்டு வெவ்வேறு குழும டிவிக்கள் ஒரே படத்தை ஒரே மொழியில் ஒளிபரப்பவிருக்கின்றனர்.

இந்த விஷயத்தை கேள்விப் பட்டவுடனே பெரும்பாலான (அனைத்து?) விளம்பரதாரகளும் தங்களது விளம்பரங்களை ஜீ தமிழ் டீவியில் நிறுத்தி விட்டு சன் டீவியில் கொடுத்து விட்டனர். இப்படி திடீரென நடந்தது தமிழக மக்களை அதிர்ச்சியில் ஆழ்த்தி உள்ளது. இதற்க்கான காரணம் என்ன என்று தெரியாமல் மக்கள் முழித்து கொண்டு இருந்த வேளையில் வெடிகுண்டு வெங்கட் தன்னுடைய முழு திறமையை உபயோகப் படுத்தி உண்மையை கண்டறிந்து மக்களுக்கு தெரியப்படுத்துகிறார்.

உண்மை - இந்த தகவல் தமிழின் முன்னணி பத்திரிக்கையாளர் ஒருவரால் கூறப்பட்டது. அதனால் இது உண்மையாக இருக்கும் என்றே நம்பப் படுகிறது. சுமார் இருவது வருடங்கள் பத்திரிகை துறையில் இருக்கும் நண்பர் தவறான தகவலை அளிக்க மாட்டார் என்ற நம்பிக்கையுடன் அந்த தகவலை இங்கு அளிக்கிறேன்.

அதாகப்பட்டது சன் டிவியின் சன் டைரெக்ட் டி.டி.எச்சில் இனிமேல் ஜி தமிழ சேனல் வருமாம். அதற்க்கு கைம்மாறாக இந்த ஒரு முறை மட்டும் இப்படி கோடிக் கணக்கில் கொடுத்து வாங்கிய உரிமையை ஜி தமிழ் நிர்வாகம் பகிர்ந்து கொள்கிறது.

அதனால், இந்த திங்கள் அன்று உலகத் தொலைக்காட்சிகளில் முதன்முறையாக ஒரே படத்தை இரண்டு சேனல்களில் பார்க்கும் பாக்கியம் தமிழக மக்களை அடைகின்றது. என்ன கொடுமை சார் இது?

உலகத்தமிழர்கள் தவற விட்ட உண்மை சம்பவம் (கன்னி மற்றும் கண்ணி சம்பவங்களின் முழு உண்மை)

2009-09-22T00:07:00.001+05:30

மக்களே,

ரொம்ப அதிசயமாக நேத்து நம்ம ஜெயம் ரவி கால் பண்ணி இருந்தான். சமீப காலமா அவன் கிட்ட இருந்து எந்த ஒரு தொடர்பும் இல்லாததால் நான் கூட அவனை கண்டுக் கொள்ளவே இல்லை. எனக்கு என்ன ஒரு சந்தேகம் என்றால் கொஞ்சம் பாப்புலாரிட்டி வந்துட்டா போதுமே, நண்பனை எல்லாம் மறந்து விடுவதா என்ன? அதனால் தான் தொடர்பு கொள்ளவில்லையோ என்னவோ என்று. ஆனால் அவன் கூட பேசிய பிறகுதான் தெரிந்தது, அப்படி எல்லாம் ஒன்றும் இல்லை என்று.

அவன் சொன்ன ரெண்டு முக்கியமான விஷயங்களை கீழே கொடுத்துள்ளேன் (அவனுக்கு இதெல்லாம் முக்கியமான விஷயங்கலாம்).

1. நேத்து தேதி 20-09 -2009 அதனால் என்னடா என்று கேட்டால், 20092009 என்று வருகிறதாம், இந்த வருடத்தில் இப்படி ஒரு முறை தான் வருமாம். ?(ஏண்டா, போன வருஷம் கூட 20082008 வந்ததே, நீ அப்ப எண்டா போன் பண்ணல?)

சரி, எப்படி தான் மொக்கை போடப் போறான் என்று நினைத்து, அந்த பாழாப் போன ரெண்டாவது விஷயம் என்னடா என்று கேட்டால், அவன் சொன்னதை கேட்டு என்னுடைய நெஞ்சே வெடித்து விடும் போல இருந்தது. (நன்றாக கவனிக்கவும், நெஞ்சுதான்)

2. அதாவது, நேத்து, அதாங்க ஞாயிற்றுகிழமை அன்று தமிழ மொழியின் தலைமகனாம் நம்ம கவிஞர் கபாலீஸ்வரன் அவர்கள் எழுதிய கவிதைகளின் ஒலி நாடாக்கள் (நன்றாக கவனிக்கவும், ஒலி நாடாக்கள் தான், வேறு எந்த நாடாவும் இல்லை) வெளியிடப் பட்டனவாம். அந்த சம்பவத்தை அவன் அப்படியே போட்டோ எடுத்து எனக்கு அனுப்பி இருந்ததால் அதனை இங்கே உங்களின் பார்வைக்கு அளிக்கிறேன்.

முதல் போட்டோ ஒரு சேஞ்சுக்கு இருட்டில் எடுக்கப்பட்டது, பயந்து விடாதீர்கள்.

கவிதை தொகுப்புகளின் பெயர்களை நன்றாக கவனிக்கவும்.

1. நீ மனிதன் தானா? (அருகிலேயே நம்ம கவிஞர் கபாலீஸ்வரன் படம் உள்ளதை கவனிக்கவும்)

2. இதயா ஒலி (இதய ஒலி அல்ல, இதயா ஒலிதான்)

3. உன்னை பார்த்து உலகம் சிரிக்கிறது (அருகிலேயே நம்ம கவிஞர் கபாலீஸ்வரன் படம் உள்ளதை கவனிக்கவும்)

4. ஆசையை அலை போலே (ஆசையே அலை போலே அல்ல, ஆசையை அலை போலே தான்)

5. முள்ளில் மலர்ந்த ரோஜா (சொல்ல ஒன்னும் இல்ல, இருந்தாலும் அருகில் ஷகீலா படம்).

இதில் முக்கியமான விஷயம் வெளியீட்டாளர் பெயருக்கு முன்னாள் உள்ள அடைமொழிகள் தான்:

கனவுக்கண்ணி (நன்றாக கவனிக்கவும், கனவுக் கன்னி அல்ல, கண்ணி தான்). இந்த கன்னி என்றால் ஆங்கிலத்தில் TRAP என்று கூட அர்த்தமாம். அதாங்க கண்ணி வெடி என்று சொல்வோமே, அந்த கண்ணி தான் இந்த கண்ணி.

அதுக்கு அப்புறம், உஸ்ஸ்ஸ்ஸ், அப்பாடா முடியல. நீங்களே படிச்சு தெரிஞ்சுகொங்கோ.

பாலிமர் டி.வி - புதிய தமிழ் சாட்டிலைட் தொலைக்காட்சி சேனல்

2009-09-20T18:43:00.001+05:30

மக்களே,

நீண்ட நெடு நாட்களாக ஆழ்தூக்கத்தில் இருந்த நான் எழுந்து வந்து விட்டேன். இனிமேல் என்னிடம் இருந்து மொக்கை பதிவுகளை நீங்கள் அடிக்கடி எதிர்பார்க்கலாம். இனிமேல் அறிவிப்புகள், விழாக்கள், சினிமா விமர்சனங்கள், சுவையான சங்கதிகள் என்று இந்த வலை ரோஜா சிறப்பாக இயங்கும் என்ற தகவலை உங்களுக்கு தெரிவிப்பதில் நான் பெறுமகிழ்ச்சி அடைகிறேன். முதன்முதலாக இதோ ஒரு விழா பற்றிய பதிவு. இந்த விழ ஒரு புதிய சாட்டிலைட் சேனல் துவக்க விழா ஆகும்.

தமிழில் ஏற்கனவே பல சேனல்கள் இருக்கின்றன. அவற்றில் குறிப்பிட்டு சொல்லும்படியாக ஒன்றிரண்டு சேனல்களே இயங்குகின்றன. இருபத்தி இரண்டு சேனல்கள் இருக்கும் இடத்தில் நான் என் ஒன்றிரண்டு சேனல் பற்றியே பேசவேண்டும் என்று கூட நீங்கள் கேட்கலாம். வாசகர்களையும், பார்ப்பவர்களையும் அடுத்த தளத்திற்கு கொண்டு செல்லாத எந்த ஒரு ஊடகமும் அவர்களுக்கு தீமையே செய்கின்றன என்பது தவிர்க்க இயலாத உண்மை. ஆங்கிலத்தில் If you are Not part of the Solution, Then You Are the Problem என்று ஒரு சொல்லாடல் உண்டு. இதனையே ரிக் வேதத்தில் கூறி இருப்பார்கள். இங்குள்ள பெரும்பாலான தொலைக்காட்சி ஊடகங்கள் நம்மை மன அளவிலும், சமூக அளவிலும் வளர விடாமல் ஒரு அடிமைகளாகவே வைத்து இருக்கின்றன.

இத்தகைய சூழ்நிலையில் தான் இந்த புதிய சாட்டிலைட் சேனல் உதயமாகிறது. பெரும்பாலான நிகழ்ச்சிகள் புதுமையாக இருக்கும் என்று உறுதி அளித்து வரும் புதன் அன்று முதல் தொலைக் காட்சி இயங்க ஆரம்பிக்கும் என்று அந்த நிறுவன தகவல்கள் தெரிவிக்கின்றன.

இந்த நிறுவனத்தினரை பற்றி தெரியாதவர்களுக்கு இந்த பத்தி: தமிழகத்தின் பெரும்பாலான பகுதிகளில் (சேலம், கோவை, ஈரோடு இன்னும் பிற) மக்கள் அதிகமாக பார்க்கும் சேனல் எது என்று ஆய்வு செய்தால் வழக்கம் போல சண் தொலைக்காட்சி தான் முதலில் வரும். ஆனால் இரண்டாவது இடத்தில் நீங்கள் நினைப்பது போல கே. டி.வியோ, கலைஞட் தொலைக்காட்சியோ, விஜய் டி.வியோ அல்லது ஜெயா டி.வியோ இல்லை. இவற்றிற்கு பதிலாக இரண்டாவது இடத்தில் வரும் சேனல் ஒரு கேபிள் தொலைக்காட்சி சேனல் ஆகும். அந்த சேனலின் பெயர் தான் பாலிமர். இதுநாள் வரை கேபிள் தொலைக் காட்சியாக மட்டுமே இயங்கி வந்த இவர்கள் தமிழ நாட்டின் முன்னணி தொலைக் காட்சி ஊடக நிபுணர்களை கொண்டு ஆரம்பிக்கும் சேனல் இது.

புதிதாக ஒன்று என்றால் நம்முடைய பத்திரிகை காரர்களுக்கு மூக்கில் வேர்த்து விடுமே? இதில் கழுகுகள் யாருக்குm சளைத்தவர் இல்லை என்பதை இந்த தகவல் மூலம் தெரிவிக்கிறார். இதனால் இதுவும் ஒரு அரசியல் சார்ந்த சேனலோ என்ற எண்ணம் மேலிட்டதால் அந்த நிறுவனத்தினரிடமும் பலரிடமும் விசாரித்ததில் அரசியல் சார்பு அற்ற நடுநிலைமை நிறுவனம் இது என்ற தகவல் கிடைத்தது.

மக்களே, இந்த பதிவு இவ்வள்வு தான். அடுத்த பதிவில் விரைவில் சந்திப்போம்.

இந்தியாவின் மானத்தை காப்பாற்றிய புரட்சிக் கலைஞர் விஜயகாந்த்

2009-06-24T22:26:00.000+05:30

மக்களே,

பல நாட்களாக என்னுடைய அரசியல் சாராத இந்த சுற்றுப் பயணத்தை முடித்துக் கொண்டு வந்து விட்டேன், உங்களை மகிழ்விக்க. என்னுடைய சுற்றுப் பயணத்தின் போது நான் கண்டு களித்த ஒரு அழகிய நதியின் டாப் ஆங்கிள் படங்கள இவை.

இந்தப் படத்தில் ஓடிக் கொண்டு இருக்கும் பேருந்தை வைத்தே இது கொல்கத்தா என்றும், அந்த நதி ஹூக்லி நதி என்றும் கண்டு பிடித்தவர்களுக்கும் பாராட்டுக்கள்.

சரி, இப்போது விஷயத்துக்கு வருவோம். இது என்னடா, புரட்சிக் கலைஞர் விஜய காந்த் எப்போது இந்தியாவின் மானத்தை காப்பாற்றினார் என்று நீங்கள் ஆச்சரியப் படலாம். அதற்க்கு பதில் சொல்லுமுன், இதோ சில அரிய படங்கள்:

பைரேட்ஸ் ஆப தி கரீபியன் என்ற அந்த பழங்காலத்து சமயத்தை அடிப்படையாக கொண்ட படத்தில் அடீடஸ் எப்படி வந்தது என்று ஆச்சர்யமா?

மகாபாரதம் மற்றும் ராமாயணத்தை அடிப் படையாக கொண்ட இந்த கிரேக்க இதிகாசத்தில் விமானம்? என்ன கொடுமை இது, பிராட் பிட்?

ஹீரோஸ் என்ற இந்த சீன வரலாற்று படத்தில் செல் பொன்? சீனர்கள் வின்ஜானத்தில் எவ்வளவு முன்னேறியவர்கள் என்பதை நீங்கள் இப்போதாவது புரிந்து கொண்டால் சரி தான்.

இதோ இந்த ஜாக்கி சான் படத்தில் கூட தெலுகு படம் பார்த்து கேட்டுப் போன அசிஸ்டன்ட் டைரக்டர்கள் நிறைய பேர் இருப்பார்கள் போல (அவங்க தான் போலீஸ ஆனா கூட ரப்பர் செருப்பு குடுத்து ஓடி வர சொல்லுவாங்க). துப்பாக்கிய எப்படி புடிக்குறது என்று கூட சொல்லி தரல. இதையெல்லாம் துப்பாக்கியை சாய்வாக பிடித்து சுடும் நம்ம கேப்டன் பார்த்தால் பாவம் அவர் மனசு எவ்வளவு கஷ்டப் படும்?

இந்த ஹாங் காங் படத்தை பாருங்கள். இந்த வில்லன் கூட "ஜாக்கிரதை" என்று சொல்வது ஏதோ அந்த படத்தோட அசிஸ்டன்ட் டைரக்டருக்கு தானோ? ஏம்பா, ராஜா ராணி காலத்து படம் என்று சொல்லி அவரு கடிகாரத்தை எல்லாம் கழட்ட சொல்ல மாட்டீங்களா?

என்னடா, இந்த கூத்தெல்லாம் சினிமாவுல தான் என்று தானே நினைக்கிறீர்கள்? அதுதான் இல்லை. உலக மகா மொக்கைச்சாமி அங்கிள் சாம் ஜார்ஜ் புஷ் இந்த சாதனையை எல்லாம் சர்வ சாதாரணமாக முறியடித்து விட்டார். இதோ பாருங்கள், ஒரு குழந்தைக்கு கூட புத்தகத்தை எப்படி படிப்பது என்று தெரிகிறது. ஆனால், நம்ம உலக மகா மொக்கைச்சாமி அங்கிள் சாம் ஜார்ஜ் புஷ் புத்தகத்தை எப்படி பார்க்கிறார் என்று பாருங்கள்.

சரி, ஏதோ ஒரு தடவ அவர் எக்கு தப்பா இருக்கும்போது எடுத்த படத்த வச்சு நம்ம உலக மகா மொக்கைச்சாமி அங்கிள் சாம் அவர்களை தப்பா எடை போடாதீர்கள் என்று தானே சொல்ல வருகிறீர்கள்? தயவு செய்து அடுத்த படத்தை பாருங்கள். ஒரு பைனாகுலாரை எப்படி உபயோகப் படுத்துவது என்று கூட நம்ம உலக மகா மொக்கைச்சாமி அங்கிள் சாம் அவர்களுக்கு தெரிய வில்லை.

சரி, சரி, நம்ம உலக மகா மொக்கைச்சாமி அங்கிள் சாம் உண்மையிலேயே ஒரு மகா மொக்கை என்பதை ஒப்புக் கொள்கிறோம், ஆனால் இதுக்கும் நம்ம கேப்டன் விஜய காந்த் அவர்களுக்கும் என்ன சம்பந்தம்? அவரை என் இந்த பதிவில் இழுத்தீர்கள்? இப்ப தான் நம்ம லக்கி அவரைப் பத்தி புத்தகமெல்லாம் எழுதி அவர ஒரு பாப்புலர் பிகர் ஆக மாத்தி விட்டுக் கொண்டு வருகிறார், இந்த சூழ்நிலையில் இப்படி ஒரு தலைப்பா? என்று கூட சிலர் நினைக்கலாம்.

ஆனால், இந்த படங்களையெல்லாம் பார்த்த அயல்நாட்டு நண்பர்கள் சிலர் என்னடா உங்க நாட்டுல இந்த படங்களுக்கு போட்டியா எதுவுமே இல்லையா? அப்ப உலக மகா மொக்கைச்சாமி போட்டிக்கு இந்தியாவின் சார்பாக என்றி ஒன்றுமே இல்லையா என்று கூட கேலியாக சிரித்தார்கள். அப்ப தான் இந்தியாவின் மானத்தை காப்பாற்ற நம்ம கேப்டன் விஜய காந்த் அவர்களின் வீரப் பிரதாபத்தை முழுவதும் காட்டாமல் (நரசிம்மா படத்தின் முதல் பாதியை பார்த்தாலே போதும், அவங்களுக்கு பாதி உயிர் காலி ஆகிடும்) ஒரே ஒரு சாம்பிள் மட்டும் காட்டினேன்;

இந்தப் படத்தில் மேனேஜிங் டைரக்டர் என்ற வார்த்தைகளின் ஸ்பெல்லிந்'ஐ சற்று கூர்ந்து பாருங்கள். ஆனால், இதற்கு முன்னரே ரமணா படத்தில் விண்டோஸ் மூவீ பிளேயரில் கேப்டன் டைப் அடிப்பதை நான் பார்த்து விட்டு மனதை தேற்றிக் கொண்டு விட்டதால் எனக்கு இதெல்லாம் பெரியதாக தெரியவில்லை. உங்களுக்கு எப்படி?

சரி, சரி, மனதை தேற்றிக் கொள்ளுங்கள். இந்த அதிர்ச்சியை தாங்கிய உங்களுக்கு இந்த தகவல் சாதரணம் தான். அதாவது இந்த பதிவின் ஆரம்பத்தில் நீங்கள் பார்த்த இரண்டு படங்களும் நம்ம கூவம் ஆற்றை டாப் ஆங்கிளில் காட்டும் படங்கள். மவுண்ட் ரோட் தாராப்பூர் டவரில் B.S.N.L Office இருந்து பார்த்து எடுத்தால் இப்படி வரும்.

கம்ப்யுட்டர் கைப்புள்ள'யின் சாகசங்கள்

2009-04-25T19:39:00.000+05:30

மக்களே,

எனது நண்பர் கூஜா ஒரு கம்ப்யுட்டர் கைப்புள்ள. அதாவது அவர் ஒரு ஐ.டி மென்பொருள் கட்டுமான வல்லுநர். அந்த துறையில இருக்குற மத்தவங்கள மாதிரியே அவருக்கும் கம்பியுட்டர் இல்லன்னா ஒன்னும் ஓடாது. உதாரணமா, அவரு எப்படி சேவிங் செய்வார் தெரியுமா?

இதென்னடா கேள்வி? மத்தவங்கள மாதிரி முகத்துலதான் என்று கிண்டலாக பதில் அளிக்காமல் தொடர்ந்து படியுங்கள். அதாவது நாமெல்லாம் செல்ப் சேவிங் என்றால் பாத் ரூம் போய் கண்ணாடி முன்னால் நின்று சேவிங் செய்து கொள்வோம். ஆனால், இவர் அப்படி இல்லை. இவருக்கு தான் கம்பியுட்டரே உலகம் ஆச்சே? அதனால் என்ன செய்கிறார் என்று பாருங்கள்.

கம்பியுட்டர் கைப்புள்ள சேவிங் செய்துக் கொள்ளும் முறை - விளக்கப் படம்

சரி, இதுல என்னடா பெரிய காமெடி? எங்கிருந்தோ வந்த ஒரு மெயில வச்சு ஒரு பதிவு போட்டுடுவியா? என்று சிலர் கேட்பது காதில் விழுகிறது. அதனால, நம்ம நண்பர் கம்பியுட்டர் கைப்புள்ள கூஜா'வுக்கு குழந்தை பொறந்தப்போ என்ன நடந்துச்சுன்னு சொல்றேன்.

கம்பியுட்டர் கைப்புள்ள கூஜாவுக்கு பொறந்தது ரெட்டைக் குழந்தைகள். அதனால் அவர் என்ன பெயர் வச்சாருன்னு யாராவது சொல்ல முடியுமா?

சார்லஸ் & பாபெஜ்?

பில் கேட்ஸ் & அல் கேட்ஸ்?

ராம் & ரோம்?

சீடி & டீவிடி?

இப்படி பல பேரு வைப்பருன்னு தானே யோசிப்பீங்க? கம்பியுட்டர் கைப்புள்ள கூஜா அப்படி எல்லாம் பண்ணல.அவரு என்ன பேரு வச்சாருன்னு தெரியுமா?

கம்பியுட்டர் கைப்புள்ள கூஜாவுக்கு பொறந்த ரெட்டைக் குழந்தைகள்

மக்களே, என்னை திட்டி மின் அஞ்சல் அனுப்புறதோ, பின்னுட்டம் இடுறதோ எண்ணம் இருந்தா, மறப்போம் மன்னிப்போம் என்ற கொள்கையில் நம்பிக்கை வைத்து கோபிக்காமல் ரெண்டு வினாடி உங்களை சிரிக்க வைத்த என்னை பாராட்டி தமிலிஷ்'ல போய் வோட்டு போட்டால் நமது இந்தியாவை காக்க வந்த கேப்டன் விஜயகாந்த் பத்தி ஒரு பதிவு இடுவேன் என்று உறுதி கூறுகிறேன்.

அபியின் கல்யாணம் நின்றது

2009-04-09T21:28:00.000+05:30

பரபரப்பு செய்தி = அபியின் கல்யாணம் நின்றது.

இன்று டாக்டர் மகேஷ் உடன் நடப்பதாக இருந்த அபியின் கல்யாணம் (இரண்டாவது கல்யாணம் - முதல் கல்யாணம் பாஸ்கர் உடன் நடந்து இப்போது விவாகரத்தும் நடந்து விட்டது) இன்று திடீரென்று நின்று விட்டது.

கல்யாணத்தை நிறுத்தியது யார்? என்று தெரிந்து கொள்வதற்கு முன்பாக ஒரு சிறு தகவல்: இந்த கல்யாணம் நடக்க கூடாது என்பதற்காக முதல் கணவன் பாஸ்கர் ஒரு துப்பாக்கியுடன் கல்யாண மண்டபத்தில் வந்து அபியை சுட எண்ணியுள்ளான்.

இந்த துடிப்பான கட்டத்தில் தான் அபியின் கல்யாணம் நின்று விட்டது.

கல்யாணத்தை நிறுத்தியது யார்?

பாஸ்கரா? (விவாகரத்து பெற்ற முன்னால் கணவன் - மறுபடியும் கல்யாணம் செய்துக் கொள்ள துடிப்பவன்).

ஆதியா? (அபியின் சகோதரன் - ஆனால் மாற்றாந்தாய்க்கு பிறந்தவன் - அபியை பழி வாங்க துடிப்பவன்)

திருவேங்கடம்'ஆ? (அபியின் சித்தப்பா - அபியின் வளர்ச்சியை பிடிக்காத ஒரு நபர் - ஆதியின் கைக்கூலி).

தொல்காப்பியன்'ஆ? (அபியின் முன்னால் நண்பர் - அபியாள் தவறாக புரிந்து கொள்ளப் பட்ட சீரியல் இயக்குனர் - அதனால் எப்போதும் நல்லவர்)

மேனகாவா? (தொழிலதிபர் - அபியால் பல வகைகளில் பாதிக்கப்பட்டவர்)

இப்படி பலரும் யோசித்துக் கொண்டு இருக்கும்போது தான் இந்த கல்யாணம் நின்று விட்டது.

கல்யாணத்தை நிறுத்தியது வேறு யாருமல்ல, சாட்சாத் அபியே தான்.

என்ன சார் இது? தன்னுடைய கல்யாணத்தை தானே யாராவது நிறுத்துவார்களா என்று கேட்பவர்கள் சரியாக மூன்று வருடங்களும் ஐந்நூறு நாட்களும் கழித்து இந்த சீரியலை பாருங்கள். அப்போதாவது யாராவது வந்து "அபி ஏன் கல்யாணத்த நிறுத்தினா தெரியுமா?" என்று கேட்டு நமக்கு எல்லாம் விடை சொல்வார்கள்.

டிஸ்கி: டோண்டு சார் சும்மா இவன்தான் பிராமணன் கதையை போட்டு விடுகிறார். நமக்கு தான் எழுதவே எந்த டாபிக்கும் இல்லை என்று நினைத்தால் இன்று இந்த சம்பவம் நடந்தது.

டோண்டு சார் கோவிச்சுக்க மாட்டேளே?

பின் குறிப்பு : திருவேங்கடத்தின் மகள் தான் டாக்டர் மகேஷ் உடன் கல்யாணம் செய்துக் கொள்ளப் போகும் பெண். இதில் கூத்து என்னவென்றால் அவளுக்கும் இது ரெண்டாவது கல்யாணம். முதல் கணவன் இப்போது தான் திரும்பி வந்து திருவேங்கடத்தின் வீட்டில் தங்கி இருக்கிறான்.

அரசியல் தலைவர்களின் அன்பளிப்பு - தே. மு & தே. பி

2009-04-07T17:33:00.000+05:30

மக்களே,

தலைப்பை பார்ர்த்து விட்டு புதிய அரசியல் கட்சியா என்று எண்ணி விடாதீர்கள்.

தே.மு - தே. பி என்பது தேர்தலுக்கு முன் - தேர்தலுக்கு பின் என்பதின் சுருக்கமே ஆகும்.

அடுத்த இரண்டு மாதங்களில் இந்தியாவின் மிகப் பெரும் சர்க்கஸ் நடக்கப் போவது உங்கள் எல்லாருக்கும் தெரியும். அந்த சர்க்கஸ் ஆட்டத்தில் கலந்து கொள்ள இருக்கும் தமிழ் நாட்டு வீரர்கள் மற்றும் வீராங்கனைகள் பின்வருமாறு:

கருணாநிதி	ஜெயலலிதா	விஜயகாந்த்	ராமதாஸ்	திருமாவளவன்

அடுத்த கட்ட தலைவர்கள் மற்றும் வருங்கால இந்திய பிரதமர்களின் விபரங்களும் இங்கே உண்டு. என்னடா இங்கே எதற்கு வடிவேலு அவர்களின் படம் உள்ளது என்று யோசிக்காதீர்கள். அவர்தான் விஜயகாந்த் எங்கே நின்றாலும் அவரை எதிர்த்து போட்டியிடப் போவதாக சொல்லி இருக்கிறாரே? மறந்து விட்டதா?

தங்கபாலு	கார்த்திக்	சரத் குமார்	விஜய டி ராஜேந்தர்	வடிவேலு

சரி, அது என்னதான் அப்படிப்பட்ட அன்பளிப்பு - கிப்ட்? அதில் என்ன தேர்தலுக்கு முன் தேர்தலுக்கு பின் என்ற பாகுபாடு என்று கேட்பவர்களுக்கு, இதோ விளக்கம்.

தேர்தலுக்கு முன்னர் பல விதமான அன்பளிப்புகள் வழங்கப்படும். ஒவ்வொரு கட்சியின் நிதி நிலையை பொறுத்து அவை நிர்ணயிக்கப் படும். அவற்றில் சில, இதோ:

தேர்தலுக்கு முன்பு கிடைக்கப் போகும் கிப்ட்- எந்த கட்சி அதிகம் கொடுக்குமோ அது தான் ஜெயிக்கும்

டெலிவிஷன்	கம்புயுட்டர்	சைக்கிள்	பிரியாணி	பணம்

ஆனால், தேர்தலுக்கு பின்னர் எந்த கட்சி ஆட்சிக்கு வந்தாலும் மக்களுக்கு கிடைக்கப் போகும் அன்பளிப்பு ஒன்றே ஒன்றுதான். இதில், மேல்ஜாதி, கீழ்ஜாதி, ஹிந்து, முஸ்லீம், கிறித்துவன், போன்ற பாகுபாடு, படித்தவன் - படிக்காதவன், பணக்காரன் - ஏழை என்று எந்த விதமான பாகுபாடும் இல்லாமல் அனைவருக்கும் ஒரே விதமான அன்பளிப்புதான் வழங்கப் படும். இதோ அந்த அன்பளிப்பின் விளக்கப் படம்:

தேர்தலுக்கு பிறகு கிடைக்கப்போகும் கிப்ட்-எந்தகட்சி ஜெயித்தாலும் ஒரே கிப்ட்தான்

முக்கிய கேள்வி:தலைவர்களே, இந்த மாத இறுதியில் நான் வெளி நாடு செல்ல இருப்பதால், அடுத்த மாதம் நடைபெற இருக்கும் அரசியல் பரிசளிப்பு விழாக்களில் (அதாங்க, தேர்தல்) பங்கேற்க இயலாது. அதனால் எனக்கு உரிய பரிசுகளை (அதாங்க அன்பளிப்பு) இப்போதே வாங்கிக் கொள்ளலாமா? எப்படி இருந்தாலும் என்னுடைய வோட்டை நீங்களே போட்டு விடுவீர்கள் தானே? நீங்க தேர்தலுக்கு பின்னாடி தர வேண்டியதை (அதாங்க நாமம்) நான் இப்பவே போட்டுக்குறேன். ஒ.கே.வா?

கலைஞர் டி.வி.ஐ காப்பாற்றிய வீரத்தளபதி ஜே.கே ரித்தீஷ், இப்போது கலைஞரை காப்பாற்றுவாரா?

2009-04-05T18:16:00.003+05:30

மக்களே,

உங்களின் சொந்த ஊர் ராமநாதபுரமா? நீங்கள் கோடை விடுமுறையில் அங்கு செல்ல நினைத்து இருக்கிறீர்களா? இன்னும் ரிசர்வேஷன் செய்யவில்லையா? அப்படியானால் உடனடியாக ராமநாதபுரம் செல்லும் என்னத்தை கை விட்டு விடுங்கள்.

அமெரிக்காவிற்கு கிரீன் கார்ட் வாங்க மக்கள் அமெரிக்க எம்பஸ்ஸி வாசலில் கியூ வில் நிற்கும் காட்சியை சென்னையில் எப்போதும் பார்க்கலாம். அதனைப் போல இப்போது ராமநாதபுரம் செல்லத் துடிக்கும் மக்களின் எண்ணிக்கை அதிகரித்துக் கொண்டே செல்கின்றது.

இந்த விஷயத்தின் மூலம் என்னவென்றால், ராமநாதபுரம் தொகுதியில் வீரத்தளபதி ஜே.கே ரித்தீஷ் தி.மு.க சார்பில் போட்டியிடுவார் என்று இன்று அதிகார பூர்வமாக அறிவிக்கப் பட்டது. மதுரையில் நடை பெற்ற இடைத் தேர்தலில் பெய்த பணமழை பற்றி கேள்விப்பட்ட தமிழக மக்கள், வீரத்தளபதி ஜே.கே ரித்தீஷ் பற்றியும் தெரிந்து வைத்து இருப்பதால் தான் இந்த நிலைமை.

"தலைவா" என்று யாராவது கூறினாலே அவர்களிடம் ஆயிரம் ருபாய் நோட்டை தூக்கி கொடுக்கும் வீரத்தளபதி ஜே.கே ரித்தீஷ், ஒரு வோட்டுக்கு என்ன செலவு செய்வார் என்பதை கணக்கு போட்டு பார்த்து விட்டு, பலர் தங்களின் சொத்து, சுகங்களை எல்லாம் விற்று விட்டு ராமநாதபுரம் சென்று குடி பெயர்வது என்று முடிவு செய்து விட்டனர். ராமநாத புரம் மக்களுக்கு கோடையில் ஒரு பணமழை தான்.

இந்த ஆண்டு ஜனவரி மாதம் கலைஞர் டி.வி.யின் ரேடிங் மிகவும் மோசமாக இருந்தது. அதாவது சன் டி.வி.யின் ரேடிங்'ஐ விட ஆறில் ஒரு பங்காக இருந்தது. அப்போது என்ன செய்வது என்று தெரியாமல் முழித்த அவர்கள், உடனடியாக வீரத்தளபதி ஜே.கே ரித்தீஷ் நடித்த நாயகன் என்ற படத்தை உலகத் தொலைக் காட்சிகளில் முதல் முறையாக ஒளி பரப்பினார்கள்.

விளைவு? அடுத்த வாரம் வந்த ரேடிங் கலைஞர் டி.வி. சன் டி.வி.ஐ நெருங்கி விட்டது. ஆம், இப்போது ரேடிங் மூன்றில் ஒரு பங்காகி விட்டது. அது மட்டும் இல்லாமல், கலைஞர் டி.வி.யின் ரேடிங் பல மாதங்களுக்கு பின்னர் இரண்டு இலக்கங்களை தொட்டதும் அப்போது தான்.

எனவே, முன்பு கலைஞர் டி.வி.ஐ காப்பாற்றிய வீரத்தளபதி ஜே.கே ரித்தீஷ், இப்போது கலைஞரையே காப்பாற்ற வேண்டிய சூழ்நிலை. காப்பாற்றுவாரா?

கடைசியாக கேள்விப் பட்ட தகவல் என்னவென்றால் அங்கு கட்சி தொண்டு ஆற்றப் போகும் இளம் சிங்கங்களுக்கு ஏ.சி பொருத்தப்பட்ட டூ வீலர் ரெடியாம். அதுவும் ஸ்பிலிட் ஏ.சி.யாம்.

சார், சார் எங்கே போறீங்க? ராமநாத புரமா? போறதுக்கு முன்னாடி கொஞ்சம் தமிளிஷ்'ல வோட்டு போட்டுட்டு போங்க சார். என்னால வீரத்தளபதி ஜே.கே ரித்தீஷ் மாதிரி எதுவும் பண்ண முடியாவிட்டாலும் நன்றி கூறுவேன்.

ஆட்கள் தேவை

2009-03-30T15:41:00.009+05:30

(இங்கு இருக்கும் படங்கள் ஒரு கிளாமருக்காக மட்டுமே)

படிப்பு தகுதி: தேவை இல்லை.

உடல் தகுதி: அவசியம் இல்லை.

முன் அனுபவம்: வேண்டவே வேண்டாம்.

உங்களுக்கு வயது 21க்கு மேலா?

உங்கள் தோல் கடினமாக இருக்குமா?

உங்களை பெற்றவர்களும் மற்றவர்களும் உதவாக்கரை என்று திட்டுகிறார்களா?

உங்களை தண்டச்சோறு என்பது ஜீரணிக்க கடினமாக உள்ளதா?

உங்களுக்கு மூன்றுவேளை சோறும் இரண்டு மாதங்களுக்கு தாங்கும் இடமும் இலவசமாக தேவை என்றால், தொடர்பு கொள்ளுங்கள்:

அடுத்த மாதம் முதல் இந்திய அளவில் நடக்கும் மிகப் பெரும் சர்கஸ் ஆட்டத்துக்கு தமிழ் நாட்டில் என்னுடைய கட்சிக்கு நாப்பது பேர் தேவை.

இவன்,
தலைவர் / துணைத்தலைவர் / உப தலைவர் /பொது செயலாளர் / செயலாளர் / உப செயலாளர் / பொருளாளர் / துணைப் பொருளாளர் / கொ.ப.செ / துணை கொ.ப.செ.

அகில இந்திய காடாளும் மக்கள் கட்சி.

பின் குறிப்பு: வெத்திலை போட்டுக் கொண்டு தொப்பி அணிந்து வருபவர்களுக்கு சிறப்பு கவனம் அளிக்கப் படும்.

பின், பின் குறிப்பு: ஆக்சுவலி, யு நோ, அது, வந்து, என்னமோ தெரியல, ரொம்ப நாள் ஆச்சுல்ல, அதனால என்னோட கட்சி பேர்ல ஏதோ ஸ்பெல்லிங் மிஸ்டேக் போல இருக்கு. யாருக்காவது நியாபகம் இருந்த பின்னுட்டம் இட்டு மாத்த சொல்லுங்களேன், பிளீஸ்.

ஐ.பீ.எல் இந்தியாவில் இருந்து மாற்றப் பட்டது எதனால்?திடுக்கிடும் சம்பவங்களும், சில திரைமறைவு அரசியல் ரகசியங்களும்

2009-03-28T19:28:00.007+05:30

சமீபத்தில் ஐ.பீ.எல் என்று அழைக்கப்படும் 20/20 கிரிக்கெட் போட்டிகள் இந்தியாவில் இருந்து மாற்றப் பட்டது. அதனை இங்கிலாந்திலும், தென்னாப்பிரிக்காவிலும் நடத்த முயற்சிகளின் மேற்கொள்ளப் பட்டன. ஆனால், அவை தென்னாப்பிரிக்கில் தான் இப்போது நடத்தப் படுகின்றன. இதனால் கடுப்படைந்த இங்கிலாந்து செக்கியுரிட்டி சேவை பிரிவு தலைவர் கார்டன் ரீச் அவர்கள் சில திடுக்கிடும் தகவல்களை அளித்தார். அவற்றில் சில அரசியல் அசிங்கங்கள், திடுக்கிடும் தகவல்கள், உள்குத்துக்கள் என பல விஷயங்கள் இருந்தன.

அவற்றின் சாராம்சம் என்னவென்றால், கடந்த 2000'ம் ஆண்டு விக்ரமன் இயக்கத்தில் கேப்டன் விஜயகாந்த் நடித்து வந்த வானத்தைப் போல படம் உலகின் நூற்றி என்பத்தி ஒன்பது நாடுகளிலும் இருநூறு நாட்கள் ஓடி சாதனை புரிந்தது அனைவருக்கும் தெரிந்த ஒன்று. குறிப்பாக "லாலா, லாலா, லாலலா" என்ற பாடல் ஆப்பிரிக்காவின் ஸுவாஹேலி நாட்டில் தேசிய கீதமாக மாற்றப் பட்டதும் அனைவருக்கும் தெரிந்ததே.

அவரின் எங்கள் ஆசான், மரியாதை என்ற இரண்டு படங்கள் தொடர்ந்து ஏப்ரல் மற்றும் மே மாதங்களில் வர இருப்பதை தெரிந்து கொண்ட இந்திய கிரிக்கெட் வாரியத் தலைவர் லலித் மோடி அவர்கள் எப்படியாவது அதனை தடுக்க முயற்சி செய்தார். எனென்றால், இந்த இரண்டு படங்கள் வந்தால் உலகமெங்கிலும் உள்ள ரசிகர்கள் அனைவரும் கிரிக்கெட் போட்டிகளை மறந்து இந்த படங்களை ரசிக்க சென்று விடுவார்கள்.

இந்த தடுப்பு முயற்சிகளை எல்லாம் அறிந்து கொண்ட நமது கேப்டன் விஜயகாந்த் அவர்கள், ஐ.நா சபை உதவியுடன் படம் வெளிவர முயற்சி மேற்க்கொண்டு அதில் வெற்றியும் கண்டு விட்டார். ஆம், ஏப்ரல் மாதம் எங்கள் ஆசான் படமும், மே மாதம் மரியாதை படமும் வரும் என்று ஐ.நா சபை உத்தரவு இட்டு விட்டது.

இனிமேல் ஒன்றும் செய்ய இயலாது என்பதை தெரிந்து கொண்ட இந்திய கிரிக்கெட் வாரியம், ஐ.பீ.எல் என்று அழைக்கப்படும் 20/20 கிரிக்கெட் போட்டிகளை ஒரேயடியாக தென்னாபிரிக்காவிற்கு மாற்றி விட்டனர்.

இதன் மூலம் இளைய தளபதி விஜய் அவர்களை விட தான் ஒரு படி மேலே என்பதை கேப்டன் நிரூபித்து விட்டார். ஆம், சிறந்த கதையும், நெஞ்சை உலுக்கும் வசனங்களும், குடும்ப குணச்சித்திர காட்சிகள் இருந்தும் இளைய தளபதி விஜய் அவர்களின் "குருவி" என்ற படம் சென்ற ஆண்டு ஐ.பீ.எல் 20/20 கிரிக்கெட் போட்டிகளால் தோல்வி அடைந்தது. இப்போது கேப்டன் அந்த ஐ.பீ.எல் 20/20 கிரிக்கெட் போட்டியே தோல்வி அடைய செய்து விட்டார்.

எங்கள் ஆசான் படம் என்ன ஆச்சு என்று இன்னமும் சில பல கோடி மக்கள் வழி மேல் விழி வைத்து காத்து இருக்கும்போது நேற்று இரவு "மரியாதை" படத்தின் சில காட்சிகளை பார்க்கும் பாக்கியம் ஏற்பட்டது. இதோ, அந்த படத்தில் வரும் சில மெகா ஹிட் வசனங்களும், சிறப்பு புகைப் படங்களும்.

சின்ன விஜயகாந்த்: திங்கறது தமிழ் நாட்டுல. ஆனா, தமிழன் வேஷ்டி கட்டிக் கிட்டு வந்தா மட்டும் கழுத்தப் புடிச்சு வெளிய தள்ளுவீன்களோ?

ரமேஷ் கண்ணா: தோசத்துக்கும் சந்தோஷத்துக்கும் என்ன வித்தியாசம்?

மீரா ஜாஸ்மின்: உன்ன நான் கிணத்துல தள்ளி சாகடிச்சா, அது தோஷம். அதுவே, நீயா கிணத்துல விழுந்து செத்தா, அது எனக்கு சந்தோஷம்.

பெரிய விஜயகாந்த் (சின்ன விஜயகாந்த்'இடம்) : தூங்குற மீன் தூண்டில்ல மாட்டிக் கொள்ளும். ஆனா, சில சமயங்கள்ல முழிச்சிக்கிட்டு இருக்குற மீனே தூண்டில்ல மாட்டிக்கும். அதுக்கு பேர்தான் விதி.

அதே மாதிரி இந்த பதிவ படிச்சதும் உங்க விதி தான். போங்க, பேசாமல் போய் தமிளிழ்'ல போய் வோட்டு போட்டுட்டு போங்க.

சூப்பர் ஸ்டார் ரஜினி'யின் ரோபோ பட ஷூட்டிங் - சென்னை ஒலிம்பியா டெக் பார்க்'ல்

2009-02-18T15:11:00.007+05:30

என்னதான் பரம ரகசியமாக வைத்து இருந்தாலும் ரஜினி படத்தை யாராலும் மறைக்க முடியாது என்பது மறுபடியும் நிரூபணம் ஆகி உள்ளது.

கடந்த ஞாயிற்று கிழமை அன்று (அதாங்க சண்டே 15-02-2009) சென்னையில் இருக்கும் ஒலிம்பியா டெக் பார்க்'ல் ரோபோ பட ஷூட்டிங் நடை பெற்றது. அந்த படப் பிடிப்பின் பிரத்யேக புகைப் படங்கள் இதோ ரசிகர்களின் பார்வைக்காக:

ரஜினியும் வில்லனும் அருகருகே: இந்த வில்லனை பார்த்தால் ஏதோ ஒரு ஆங்கிலப் படத்தில் வரும் வில்லனை அப்படியே காப்பி அடித்தது போல உள்ளது.

ஷங்கருக்கு இது ஒன்றும் புதிது அல்லவே. ஏற்கனவே அவர் சிவாஜி படத்தில் வரும் மொட்டை ரஜினியை ஷாப்ட் என்ற படத்தின் நாயகனை மைய்யமாக கொண்டே அமைத்தார்.

ஏதேது? படத்தில் ரஜினி வெயிட் போட்டு உள்ளதைப் போல தெரிகிறதே? இந்த படத்தில் உள்ள ரஜினி கமல் போல இருக்கிறார் (ஆளவந்தான் கமல்)

இது தான் நம்ம சூப்பர் ஸ்டார் ரஜினி. எப்பவும் ஸ்டைல். எல்லாமே ஸ்டைல்.

அடுத்த வாரம் வேற எங்கே ஷூட்டிங் பண்ணலாம்?

வெஸ்ட் இண்டீஸ் கிரிக்கெட் அணிக்கு ஸ்பான்சர் செய்த அமெரிக்க தொழில் அதிபர் ஆலன் ஸ்டான்போர்ட் கைது

2009-02-17T23:09:00.003+05:30

வெஸ்ட் இண்டீஸ் கிரிக்கெட் அணிக்கு மேலும் ஒரு துக்க செய்தி.

வியாபார காந்தம் ஆலன் ஸ்டான்போர்ட் அமெரிக்க போலிஸ் அதிகாரிகளால் கைது செய்யப்பட்டார்.

அமெரிக்காவில் உள்ள டெக்சாஸ் மாகாணத்தை சேர்ந்த திரு ஆலன் ஸ்டான்போர்ட் அவர்கள் இன்று அமெரிக்க போலிஸ் அதிகாரிகளால் திடீரென்று கைது செய்யப் பட்டர். அமெரிக்க பங்கு வர்த்தக செக்கியூரிடிஸ் மற்றும் எக்ஸ்செஞ் துறையினர் "நினைத்தே பார்க்க இயலாத அளவிற்கு' ஒரு பெரிய குற்றத்தை இவர் செய்ததாக கூறியுள்ளனர்.

ஸ்டான்போர்ட் அவர்கள் அமெரிக்காவை சேர்ந்தவராக இருந்த போதிலும் அவர் வெஸ்ட் இண்டீஸ் தீவுகளில் ஒன்றான அன்டீகா & பார்புடா குடிய்ரிமையையும் பத்து ஆண்டுகளுக்கு முன்பு பெற்றார்.

இவர் யார்? சென்ற ஆண்டு உலகிலேயே ஒரு போட்டிக்காக அதிகபட்ச தொகையாகிய இருபது மில்லியன் டாலர்களை எப்படி இவர் அளித்தார்? (ஆம், சென்ற ஆண்டு ஸ்டான்போர்ட் சூப்பர்ஸ்டார்ஸ் அணி இங்கிலாந்து அணியை தோற்கடித்து இதனை வென்றது).

1932ல் தன்னுடைய தாத்தா துவக்கி வைத்த ரியல் எஸ்டேட் கம்பெனியை ஸ்டான்போர்ட் பொறுபேற்று கொண்டது என்னவோ 1980ல் தான். பின்னர் அந்த கம்பெனியை பல சாதனைகள் புரிந்து (நம்ம சத்யம் ராமலிங்கராஜு போலவா?) இன்று உலகின் முன்னணி கம்பெனிகளில் ஒன்றாக கொண்டு வந்துள்ள இவர் இன்று கைது செய்யாப் பட்டது உண்மையிலேயே அதிர்ச்சி அளிக்கும் ஒரு தகவல் தான்.

வெஸ்ட் இண்டீஸ் அணியை சற்று நினைத்து பாருங்கள். உலகிலேயே வறுமையில் அடிபடும் அணியாகிய அணிக்கு ஒரு ஆபத்தாந்தவனாக வந்தவர் இந்த ஸ்டான்போர்ட். கடந்த வாரம் தான் தன்னுடைய அனைத்து கிரிகெட் சார்ந்த பணிகளை தற்காலிகமாக நிறுத்துவதாக அறிவித்தார்.

அவருக்கு முன்பே தெரியுமோ என்னவோ?

மேல் தகவல்களுக்கு:
crikinfo சுட்டி: Click here
ஸ்டான் போர்ட் பற்றிய விகிபீடியா சுட்டி: click here.

நம்ம ஊர் நடிகர்களின் வருங்கால படங்கள் - ஒரு காமடி

2009-02-17T16:30:00.002+05:30

நம்ம ஊர் நடிகர்களின் வருங்கால படங்கள் - ஒரு காமடி: இப்போ போற போக்கை பார்த்தல் படங்களின் பெயருக்கு கூட பஞ்சம் வந்து விடும் போல இருக்கிறது. அதனால் நம்முடைய சூப்பர் நடிகர்களுக்கு அந்த நிலைமை வரக் கூடாது என்று நானே (சுயமாக சிந்திச்சு) சில தலைப்புகளை சூட்டி உள்ளேன். குறிப்பிட்ட நடிகர்களின் ரசிகர்கள் கோபிக்க வேண்டாம்.

முதலில் நம்ம கேப்டன் விஜயகாந்த் = தர்மபுரி, சேலம், ஈரோடு, நாமக்கல், தூத்துக்குடி, மயிலாடுதுறை, இப்படியே போக வேண்டியது தான். என்ன ஒரு பிரச்சினை நம்ம பேரரசு சண்டைக்கு வருவார்.

அடுத்து நம்ம இளைய தளபதி விஜய், மன்னிக்கவும் டாக்டர் விஜய்: வில்லு, அம்பு, கம்பு, கத்தி, கபடா, நெறைய இருக்கு.

அருவாள், வீச்சரிவா என்று போனால் தான் ஹரி சண்டைக்கு வருவார்.

தல அஜித் = அசல், நகல், ஒரிஜினல், ஜெராக்ஸ், கலர் ஜெராக்ஸ், இன்னும் நெறைய நெறைய இருக்கு. அப்படி இது சரியா வரலன்னா, அசல், வட்டி, கடன், மீட்டர் வட்டி, கந்து வட்டி, இப்படியும் போகலாம். எப்படி வசதி?

சூர்யா = வாரணம் ஆயிரம், தோரணம் ரெண்டாயிரம், பூரணம் மூவாயிரம், பஞ்சவர்ணம் நாலாயிரம், காரணம் அஞ்சாயிரம் இப்படி சொல்லிகிட்டே போகலாம்.

என்ன, மாமா பிஸ்கோத்து என்று யாரும் கேக்காத வரை.

வருங்கால (அது எப்போ வருமோ) சூப்பர் ஸ்டார் இன்றைய லிட்டில் சூப்பர் ஸ்டார் சிம்பு = சிலம்பாட்டம், புலியாட்டம், கரகாட்டம், குயிலாட்டம், மயிலாட்டம், பாம்பாட்டம் இப்படி பல கலைகளை கூறிக்கொண்டே போனால் போதும்.

அந்த பெயரில் எல்லாம் சிம்பு வருவார்.

நடிகர் ஜீவா (அப்ப மத்தவங்க எல்லாம்?) = ஈ, கொசு, எறும்பு, கரப்பான்பூச்சி, மூட்டபூச்சி, மண்புழு... சொல்ல சொல்ல கொமட்டிட்டு வருது. இதோட நிறுத்திக்குவோம். பேசாம அவர் ராமேஸ்வரம், காசி, கன்னியாகுமரி, இப்படி ஸ்டார்ட் செய்யலாமே?

புரட்சி தளபதி விஷால் = சத்யம், சங்கம், அபிராமி, உதயம், வூட்லண்ட்ஸ், தேவி, ஐநாக்ஸ், இன்னும் நெறைய இருக்கு.

இயக்குனர் சேரன் (அப்போ ஓட்டுனர் சேரன் யாராம்?) = ராமன் தேடிய சீதை, லக்சுமணன் தேடிய சீதை, அனுமன் தேடிய சீதை, ராவணன் தேடிய சீதை, வாலி தேடிய சீதை, சூர்பனகை தேடிய சீதை யப்பா முடியல. இது போர் அடிச்சா, கைகேழி தேடிய சீதை, கூனி தேடிய சீதை, பாரதன் தேடிய சீதை என்றும் ஆரம்பிக்கலாம்.

நகுல் = காதலில் விழுந்தேன், ரோட்ல விழுந்தேன், பைக்'ல விழுந்தேன், கிழே விழுந்தேன், செப்டிக் டாங்கில் விழுந்தேன் இன்னும் நெறைய எதிர் பார்க்கிறோம்.

நாயகன் ஜீவன் = தோட்டா, புல்லட், பீரங்கி, துப்பாக்கி. பழைய படமா வேணும்னா ரெட்டை குழல் துப்பாக்கி, காது வச்ச பீரங்கி இன்னும் கூட இருக்கு. சொல்லட்டுமா?

சியான் விக்ரம் = கந்தசாமி, கருப்புசாமி, குப்புசாமி (அட நம்ம நல்லி குப்புசாமி இல்லாப்பா), குழந்தைசாமி, மாடசாமி, ஆருச்ச்சாமி, எழுச்சாமி, எட்டுச்சாமி, இப்படி பெயர் வச்ச இது ஒரு வசதி.

பார்க்க பார்க்க பிடிக்கும் தனுஷ் = படிக்காதவன், உருப்படாதவன், தருதல, ஒன்னுத்துக்கும் ஒதவாதன், சூப்பர் ஸ்டார் மருமகன் என்பதால் அவர் ரசிகர்கள் கோபிசுசுகுவாங்கோ.

ஆர்யா = நான் கடவுள், நான் மிருகம், நான் பேய், நான் சாத்தான், நான் பிசாசு, நான் பைத்தியம்

ஜெயம் ரவி (நம்ம செந்தழல் ரவி பிரண்டா?) = சம்திங் சம்திங், நத்திங் நத்திங், எனிதிங் எனிதிங், எவ்ரிதிங் எவ்ரிதிங் இப்படி பல.

நரன் = அஞ்சாதே, ஆறாதே, எழாதே, எட்டாதே,

மக்கள் தலைவர் சரத் குமார் = 1977, 1978, 1979, 1980 ...அய்யா, நீங்க 2011க்கு வர ரொம்ப காலம் பிடிக்குமே?

எஸ்.ஜெ.சூர்யா = நியுட்டனின் மூன்றாம் லா, பாஸ்கல் லா, ஒம்'ஸ் லா, ஷகீ லா,

மாதவன் = குரு என் ஆளு, ப்ரியா உன் ஆளு, நமிதா என் ஆளு, (சிம்பு) நயன் என் ஆளு,

கார்த்தி = பருத்தி வீரன், புண்ணாக்கு வீரன், கழனி தண்ணி வீரன், மாட்டு தீவனம் வீரன்

சாந்தனு = சக்கர கட்டி, உப்புக் கட்டி (புரடியூசருக்கு), சுண்ணாம்பு கட்டி (படத்த பார்த்தவங்களுக்கு), சந்தன கட்டி (அப்பாவுக்கு)

இந்த லிஸ்ட் போதுமா, இன்னும் கொஞ்சம் வேணுமா?

2009ல் சிங்களம், 2011ல் தமிழகம்-இளைய தபதி விஜய் அவர்களின் முழக்கம்

2009-02-16T13:13:00.004+05:30

நண்பர்கள் அனைவருக்கும் வணக்கம். பல நாட்களாக இந்தியாவில் இல்லாததால் என்னால் வலையுலக பணிகளை கவனிக்க முடியவில்லை. மன்னிக்கவும்.

திரும்பிய உடனே எனக்கு ஒரு அதிர்ச்சி மெயில் வந்தது. அதனை பார்த்த உடனே எனக்கு ஒரு கணம் கையும் ஓட வில்லை, வில்லும் - மன்னிக்கவும் - காலும் ஓட வில்லை.

இதோ அந்த படங்களை உங்களின் மேம்பட்ட பார்வைக்கு வைத்து உள்ளேன். பாருங்கள்.

சிவபெருமானுக்கும் விஜய்க்கும் என்ன சம்பந்தம்?

அட, விஜய்க்கும் சிங்களத்துக்கும் என்ன சம்பந்தம்?

அட, 2011க்கும் விஜய்க்கும் என்ன சம்பந்தம்?

இதை எல்லாம் கேட்டால் நம்மளை முட்டாள்'ன்னு சொல்றாங்க தல.

இப்போது சில பல கேள்விகள்:

இவை எல்லாம் டாக்டர் விஜய் அவர்களின் பார்வைக்கு போகுமா?

எல்லாம் தெரிந்துமா அவர் சும்மா இருக்கிறார்?

ஹிந்து முன்னணி என்ன செய்து கொண்டு இருக்கிறது? முன்பு ஒருமுறை இதைப் போல போஸ்டர் ஒட்டியதற்கு அவர்கள் பிரச்சினை செய்ததாக நியாபகம்.

இந்த முறை விஜய் அவர்கள் எடுபட்டு உள்ளதால் அமைதியாக விட்டு விட்டார்கள?

இதை படித்து விட்டு நீங்கள் என்ன செய்யப் போகிறீர்கள்?

போய் தமிலிஷ்'இல் வோட்டு போடுங்கள் சார்,உங்களுக்கு புண்ணியமாக போகும்.

இளைய தளபதி விஜய்'யின் வில்லு படத்தின் கதை

2008-12-17T21:45:00.001+05:30

முன்குறிப்பு: வாசக நண்பர்கள் அனைவரும், குறிப்பாக இளைய தளபதி விஜய்'ன் ரசிகர்கள், என்னை திட்டலாம். என்னடா இவன், இன்னும் முப்பது நாளில் வெளி வரப் போகும் வில்லு படத்தின் கதையை இப்போதே கூறி விட்டானே என்று. என்ன செய்வது, வாசகர்கள் என்னுடைய எழுத்தையும் படிக்க வேண்டும் என்றால் இது போன்ற ஏதாவது வித்தியாசமாக செய்தால் ஒழிய வேறு வழி இல்லை.

படம் : வில்லு

ஹீரோ ; விஜய், என்னை போன்ற பல விஜய் ரசிகர்கள் மன்னிக்கவும், மருத்துவர் விஜய் (இப்போது மருத்துவர்கள் மன்னிக்கவும்)

இயக்குனர் : பிரபுதேவா

ஹீரோயின் : நயன்தாரா

வெளியாகும் நாள் : சனவரி 15 (தை மாதம் முதல் நாள்)

சிறப்பு அம்சம் : மருத்துவர் விஜய் இரட்டை வேடங்களில் (அப்பா புகழ் மற்றும் மகன் ராஜா) நடிப்பதும், நடிகை குஷ்பூ ஒரு பாடலில் மட்டும் நடனம் ஆடுவதும்.

படத்தின் கதை: அப்பா கதாபாத்திரத்தில் இருக்கும் விஜய் சுமார் 45 வயதுடையவர். அவர் இந்திய ராணுவத்தில் மேஜர் ஆக பணி புரிகிறார். அவருடன் பணி புரியும் சக ராணுவ அதிகாரிகள் இந்திய ராணுவ ரகசியங்களை அயல் நாட்டிற்கு உளவு சொல்வதை கண்டு பிடிக்கிறார்; அதனால் அவர்களால் துரோகமாக கொல்லப் படுகிறார் (இவை எல்லாம் பிளாஷ்பாக்'ல் வருபவை, நான் உங்களுக்கு கோர்வையாக சொல்லுகிறேன்).

ஆஸ்திரேலியாவில் மேல் படிப்பு படித்து கொண்டு இருக்கும் விஜய் (மகன் = ராஜா) வழமை போல ஒரு அறிமுக பாடல் மூலம் தோன்றி நம்மை எல்லாம் அசத்துகிறார். இந்த பாடலில் அவருடன் ஆடுவது நம் மனம் கவர்ந்த நடிகை குஷ்பூ ஆகும். பின்னர் ராஜா பிரகாஷ் ராஜ்'ன் மகளாகிய நயன்தாராவை காதலிக்கிறார். திடீரென்று அவருக்கு ஒரு உத்தரவு வருகிறது. அந்த உத்தரவின் படி முன்-பின் அறிமுகம் இல்லாத ஒருவரை (பிஜு மேனன் ) ராஜா தடயம் இல்லாமல் கொலை செய்கிறார் & பின்னர் அவர் வளர்க்கும் அனைத்து பறவைகளையும் (குருவி உட்பட) கொன்று விடுகிறார்.

அங்கே அவர் வடிவேலு'வை சந்திக்கிறார். படத்தில் வடிவேலு மதுரை சித்திரை திருவிழாவில் தொலைந்த தன்னுடைய சகோதரனை ஆஸ்திரேலியாவில் தேடும் படலம், அற்புதமான நகைச்சுவை காட்சிகள் நிறைந்த கதம்பம். அதே போல, நயன்தாராவின் அறிமுகப் பாடலில் (உள்ளத்தை அள்ளித்தா ரம்பா போல) அவரின் ஸ்கர்ட் காற்றில் பறக்கும் காட்சிகள் முதல் பெஞ்சில் இருக்கும் விசிலடிச்சான் குஞ்சுகளை கண்டிப்பாக உற்சாகப் படுத்தும்.

பின்னர் பிரகாஷ் ராஜ்'ன் தொழில் பார்ட்னர் ஆக வரும் நெப்போலியன்'ஐயும் மர்மமான முறையில் (மறுபடியும் மர்ம உத்தரவை பின்பற்றி) கொலை செய்கிறார் & பின்னர் அவர் வளர்க்கும் அனைத்து பறவைகளையும் (குருவி உட்பட) கொன்று விடுகிறார். இந்த மரணங்களை தொடர்ந்து பிரகாஷ் ராஜ்'ஐயும் கொல்ல முயற்சிக்கிறார். அப்போது நயன்தாரா குறுக்கிட்டு அந்த முயற்சியை முறியடிக்கிறார். அப்போது நயன்தாராவின் கேள்விகளுக்கு விஜய் பதில் அளிக்காமல் அவரது அம்மாவை (சிம்ரன்) அறிமுகப் படுத்துகிறார். சிம்ரனும் மேலே எதுவும் கூறாமல் ஒரு டையரியை கொடுக்கிறார்.

அந்த டையரியில் புகழ் கதாபாத்திரத்தில் வரும் விஜய்'ன் அப்பா "என்னுடைய மரணத்திர்ர்க்கு காரணம் குருவி....................................." என்று இருக்கிறது. அந்த டையரியை படிக்கும் சிம்ரன் தன் கணவனின் படுகொலைக்கு பழி வாங்க மர்ம உத்தரவுகளை கொடுக்கிறார். அதனால் தான் மகன் விஜய் குருவி வளர்க்கும் பண்ணை அதிபர்களை எல்லாம் கொலை செய்கிறார்.

இப்போது பிரகாஷ் ராஜ் வந்து அந்த டைரியின் கிழிந்த கடைசி பக்கத்தை கொடுக்கிறார். அதில், "என்னுடைய மரணத்திர்க்கு காரணம் குருவி படத்தை பார்த்தது ஆகும்" என்று குறிப்பிடப்பட்டுள்ளது. மேலும் அதனுடன் ஒரு குருவி படத்தின் திருட்டு டிவீடி'யும் உள்ளது. இதை முழவதும் படித்து மனம் திருந்தும் மகன் விஜய் தன்னுடைய அடுத்த படத்திற்கு "வேட்டைக்காரன்" என்று பெயரிட்டு நடிக்க செல்லுகிறார். இதனை பொறுமையுடன் படித்த நண்பர்கள் தமிழிஷ்'இல் வோட்டு போட்டு விட்டு இதை எல்லாம் படித்தோமே என்று மனம் நொந்து செல்கின்றனர்.

பின் குறிப்பு: நானும் ஒரு விஜய் ரசிகன் தான். எனவே என்னுடைய வீட்டிற்கு ஆட்டோ அனுப்புவது, என்னை கேவலப் படுத்தி பின்னுட்டம் இடுவது போன்ற செயல்களில் ஈடுபடாமல் Sportive ஆக இதனை எடுத்து கொள்ளவும். இந்த இடுகையின் மூலம் யாருடைய மனதையும் புண்படுத்தி இருந்தால் மன்னிக்கவும்.

இங்கிலாந்து கிரிக்கெட் அணியும், கவுண்ட மணியும்

2008-12-14T20:06:00.007+05:30

இங்கிலாந்து கிரிக்கெட் அணி தேர்வும், ஒரு மர்ம போன் காலும்

மன்னிப்பு: இந்த சம்பவம் நடைபெற்றது ஒரு மாதத்திற்கு முன்பாக. தாமதமாக இந்த பதிவை வெளியிடுவதற்கு மன்னிக்கவும்.

இன்றைய ஆட்ட நிலை: இந்தியா மற்றும் இங்கிலாந்து அணியினருக்கு இடையேயான முதலாவது டெஸ்ட் போட்டியில், கடந்த ஒரு வருடமாக தடுமாறி வந்த ஆன்ட்ரு ஸ்ட்ராஸ்'ம் பால் காலிங் வூட்'ம் ஆளுக்கொரு சதமடித்து இந்தியர்களுக்கு கடினமான இலக்கை அளித்து உள்ளனர்.

சம்பவம்: அது ஒரு மிகப் பிரபலமான ஓட்டல். அதன் கான்பரன்ஸ் ஹாலில் ஐந்து கனவான்கள் கூடி இருந்தனர். அவர்கள் தான் இங்கிலாந்து கிரிக்கெட் அணி தேர்வாளர்கள். அவர்கள் இந்தியா செல்லும் இங்கிலாந்து கிரிக்கெட் அணியை தேர்வு செய்யும் பணியில் ஈடுபட்டு இருந்தனர்.

அவர்கள் தேர்வு செய்த அணியில் துவக்க ஆட்டக்க் காரராக லுக் ரைட்'ஐயும், மத்திய நிலை ஆட்ட காரராக ரவீ போபாரா'வையும் தேர்ந்து எடுத்து இருந்தனர். அந்த அணியில் ஆன்ட்ரு ஸ்ட்ராஸ்'உம் பால் காலிங் வூட்'உம் இடம் பெற வில்லை. அணியை முடிவு செய்த அவர்கள் பத்திரிக்கையாளர்களை அழைக்க இருந்த நேரத்தில் ஒரு போன் கால் வந்தது.

அப்போது வந்த போன் காலை செய்தவர் திரு மைகேல் வாகன் ஆகும். அவர் இங்கிலாந்து அணியின் முன்னால் தலைவர் ஆவார். கடந்த பத்து வருடங்களாக இந்தியாவுடன் தொடந்து விளையாடிய அனுபாவம் பெற்றவர் ஆவார். அவர் தேர்வாளர்களிடம் அணியை பற்றி விசாரித்தார். அவர்களும் அணி விவரங்களை தெரிவித்தனர். அதில் ஆன்ட்ரு ஸ்ட்ராஸ்'ம் பால் காலிங் வூட்'ம் இடம் பெற வில்லை என்ற செய்தியை கேட்டு அதிர்ச்சியடைந்தார் மைகேல் வாகன். அதற்க்கு பதிலளித்த தேர்வாளர்கள் கடந்த ஒரு வருடமாக இந்த இரு ஆட்டக்காரர்களும் சிறப்பாக விளையாடததை சுட்டிக் காட்டி அதனால் தன் அவர்கள் தேர்வு செய்யப் படவில்லை என்றும் கூறினார்.

நிற்க.

சமீபத்தில் 1990'களில் வெளிவந்த ஒரு தமிழ் படத்தில் நகைச்சுவை வேந்தர் திரு கவுண்டமணி அவர்கள் ஒரு குறிப்பிட்ட வசனத்தை பேசுவார். அதாவது அவரின் மாமனார் கறுப்பாக இருப்பார். ஆனால் அவரின் மனைவியும் பெண்களும் செக்கச் செவேல் என்று இருப்பதை கண்டு வியப்பார் கவுண்டர். அதற்க்கு அவரின் மாமனார் "மாபிள்ளை, என்னை பார்க்காதீர்கள். என்னுடைய மனைவியை பாருங்கள்" என்று கூறுவர். அப்போது கவுண்டர் "அதாவது, வெதைக்குரவனை பாக்காதே, வெளையுற நிலத்தை பாரு'ன்னு சொல்லுர" என்பார்.

தொடர்க.

மேலே குறிப்பிட்ட அந்த தமிழ் படத்தை லண்டனில் கலைஞர் டிவி;யில் (லக்கி கவனிக்க) பார்த்து கொண்டு இருந்த மைகேல் வாகன், உடனே தேர்வாளர்களுக்கு போன் செய்து பேசியது தான் மேலே நடந்தது. அப்போது அவர் தேர்வாளர்களிடம் "நீங்கள் இங்கிலாந்து அணியை மட்டும் பார்க்காதீர்கள். அவர்கள் விளையாடப் போகும் எதிர் அணியையும் பாருங்கள். கிரிக்கெட் வரலாற்றை கடந்த பல வருடங்களாக கூர்ந்து பார்த்தால், இந்திய அணி விளிம்பு நிலையில் இருக்கும் மற்ற அணி வீரர்களுக்கு உதவுவது நன்றாக தெரியும்".

தேர்வாளர்: " என்ன சார் சொல்றீங்க?".

மைகேல் வாகன்: " ஆமாம், உதாரணமாக அட்டப்பட்டு என்ற வீரரின் அஸ்தமனம் ஆன கிரிக்கெட் வாழ்கையை மீண்டும் துவக்கி வைத்தனர் இந்தியர்கள். இப்படியாக மாத்யூ ஹெயடன், சயீத் அன்வர், சனத் ஜெயசூர்யா, சிவநராயன் சந்தர்பால்; ஏன் எனக்கே மறு வாழ்வு கொடுத்தவர்கள் இந்திய அணியினர். ஆகையால் இங்கிலாந்து அணியை பார்க்காதீர்கள். அவர்களுடன் விளையாடும் இந்திய அணியையும் பாருங்கள், கவுண்டர் கூறியதைப் போல".

இதன் தொடர்ச்சியை நீங்கள் நன்கு அறிவீர்கள். கவுண்டர் அவர்களின் வசனங்கள் எவ்வளவு பிரபலம் என்பதையும், அதன் விளைவுகளையும் இப்போது தெரிந்து கொள்ளுங்கள். எவ்வளவு நாள் ஆனாலும், எவ்வளவு பேர் வந்தாலும் கவுண்டர் கவுண்டர் தான்.

டிசம்பர் மாதம் - சின்ன திரை ஸ்பெஷல்

2008-12-13T17:45:00.003+05:30

ஏதோ ஒரு நோக்கத்தில் ஆரம்பித்துவிட்டதால், இப்போதைக்கு முதல் பதிவாக டிசம்பர் மாதம் - சின்ன திரை ஸ்பெஷல் என்ற தலைப்பில் இந்த மாதம் சின்ன திரையில் வரப் போகும் திரை படங்களின் விவரங்களை உங்களுக்கு தெரிவிக்கிறேன்.

விரைவில் என்னை பற்றிய எண்ணங்களையும், இந்த வலைப் பூவின் நோக்கதையும் தெரிவிக்கிறேன்.

முதலில் கலைஞர் தொலைக்காட்சி நிகழ்ச்சிகள் (இல்லையெனில் என்னுடைய மானசீக குரு, வலைப்பூ வித்தகர் லக்கிலுக் கோபித்து கொள்வார்)

பெரிய திரையில் பல விவாதங்களுக்கு உரிய படங்களில் நடித்த சோனியா அகர்வால் முதன்முறையாக சின்ன திரையில் தோன்றும் மெகா தொடரே "நாணல்". நடிகை குஷ்பூ தயாரித்து, கதை எழுதி மேற்பார்வையிடும் இந்த தொடரை இயக்குபவர் பல வெற்றிப் படங்களை தந்த ராபர்ட் ராஜசேகர் ஆகும்.

இந்த தொடர் இந்த மாதம் மூன்றாம் வாரத்தில் இருந்து வெளிவரும் என்று நம்பத் தகுந்த வட்டாரங்கள் தெரிவிக்கின்றன.

படம்: கல்லூரி
இயக்குனர்: பாலாஜி சக்திவேல் இசை அமைப்பாளர்: ஜோஷுவ ஸ்ரீதர்
நடிப்பு: தமன்னா, அகில்
தயாரிப்பு: இயக்குனர் ஷங்கரின் எஸ் பிக்ச்சர்ஸ்
வெளியீடு: December 7th, 2007
திரை இடுதல்: 25th December 08.
குறிப்பு: உலகத் தொலைக் காட்சிகளில் முதன் முறையாக

படம்: தொட்டால் பூ மலரும்
இயக்குனர்: பி.வாசு
இசை அமைப்பாளர்: யுவன் ஷங்கர் ராஜ
நடிப்பு: சக்தி, வடிவேலு, ராஜ் கிரண்
வெளியீடு: 03rd August 2007.
திரை இடுதல்: 31st Dec 08

படம்: வாழ்த்துக்கள் இயக்குனர்: சீமான்
இசை அமைப்பாளர்: யுவன் ஷங்கர் ராஜா
நடிப்பு: மாதவன், பாவனா வெளியீடு: January 14th 2008.
திரை இடுதல்: 1st January 2009
குறிப்பு: உலகத் தொலைக் காட்சிகளில் முதன் முறையாக

படம்: ராமேஸ்வரம்
இயக்குனர்: செல்வம்
இசை அமைப்பாளர்: நீரு
நடிப்பு: ஜீவா, பாவனா
வெளியீடு: 2007
திரை இடுதல்: 13th December 2008
குறிப்பு: உலகத் தொலைக் காட்சிகளில் முதன் முறையாக

படம்: அருணாசலம்
இயக்குனர்: சுந்தர் சி
இசை அமைப்பாளர்: தேவா
நடிப்பு: சூப்பர் ஸ்டார், சௌந்தர்யா, ரம்பா
தயாரிப்பு: இயக்குனர் கே.எஸ்.ரவிக்குமார்
வெளியீடு: 1997
திரை இடுதல்: 14th December 2008

படம்: ஒரு கல்லூரியின் கதை
இயக்குனர்: நந்தா பெரியசாமி
இசை அமைப்பாளர்: யுவன் ஷங்கர் ராஜா
நடிப்பு: ஆர்யா, சோனியா அகர்வால்
வெளியீடு: 2005
திரை இடுதல்: 20th December 2008

படம்: எவனோ ஒருவன்
இயக்குனர்: நிஷிகாந்த் காமத்
இசை அமைப்பாளர்: ஜீ.வீ. பிரகாஷ்குமார்
நடிப்பு: மாதவன், சங்கீதா
வெளியீடு: December 7, 2007
திரை இடுதல்: 21st December 2008
குறிப்பு: உலகத் தொலைக் காட்சிகளில் முதன் முறையாக

படம்: வல்லவன்
இயக்குனர்: சிலம்பரசன்
இசை அமைப்பாளர்: யுவன் ஷங்கர் ராஜா
நடிப்பு: சிம்பு, நயன் தாரா, ரீமா சென்
வெளியீடு: 2006
திரை இடுதல்: 27th December 2008

படம்: தில்
இயக்குனர்: தரணி
இசை அமைப்பாளர்: வித்யா சாகர்
நடிப்பு: விக்ரம், லைலா, விவேக்
வெளியீடு: 2001
திரை இடுதல்: 28th December 2008

படம்: திருட்டு பயலே
இயக்குனர்: சுசீ கணேசன்
இசை அமைப்பாளர்: பரத்வாஜ்
நடிப்பு: ஜீவன், சோனியா அகர்வால், விவேக் வெளியீடு: 2006
திரை இடுதல்: 03rd Jan 2009

படம்: அந்நியன்
இயக்குனர்: ஷங்கர்
இசை அமைப்பாளர்: ஏ.ஆர் ரஹ்மான்
நடிப்பு: விக்ரம், சதா, விவேக்
வெளியீடு: 2001
திரை இடுதல்: 31st Dec 2008

படம்: திருப்பாச்சி
இயக்குனர்: பேரரசு
இசை அமைப்பாளர்: தீனா
நடிப்பு: விஜய், திரிஷா
வெளியீடு: 2005
திரை இடுதல்: 01st Jan 2009

ஆங்கில படம்: பேட் பாய்ஸ் (Bad Boys 2)
இயக்குனர்: மைக்கேல் பே
நடிப்பு: வில் ஸ்மித், மார்டின் லாரன்ஸ்
வெளியீடு: 2003
திரை இடுதல்: 14th Dec 2008
குறிப்பு: உலகத் தொலைக் காட்சிகளில் தமிழில் முதன் முறையாக

ஆங்கில படம்: கிரிம்சன் டைட் (Crimson Tide) இயக்குனர்: டோனி ஸ்காட்
நடிப்பு: டென்செல் வாஷிங்டன், ஜீன் ஹக்மேன் வெளியீடு: 1995
திரை இடுதல்:21st Dec 2008
குறிப்பு: உலகத் தொலைக் காட்சிகளில் தமிழில் முதன் முறையாக

ஆங்கில படம்: மெக்கனாஸ் கோல்ட் (Mackennas Gold) இயக்குனர்: லீ தாம்சன்
நடிப்பு: கிரிகாரி பெக், ஒமார் ஷேரிப்ப்
வெளியீடு: 1969
திரை இடுதல்:28th Dec 2008
குறிப்பு: உலகத் தொலைக் காட்சிகளில் தமிழில் முதன் முறையாக

ஆங்கில படம்: பிளப்பேர் (Flubber)
இயக்குனர்: லெஸ் மேபில்ட்
நடிப்பு: ராபின் வில்லைம்ஸ், மார்சியா கே
வெளியீடு: 1997
திரை இடுதல்:4th Jan 2009
குறிப்பு: உலகத் தொலைக் காட்சிகளில் தமிழில் முதன் முறையாக